Moyo na Matendo

Kitu Sahihi Moyo Sahihi

Kuhusu mfalme Amazia maandiko yanasema, “Akafanya yaliyo ya adili machoni pa BWANA lakini si kwa moyo mkamilifu.” (2Nyakati 25:2).

TUNAJUFUNZA MAMBO YAFUATAYO TOKA ANDIKO HILI

1. Mtu anaweza kufanya kitu kizuri lakini moyo wake ni mbaya

Mfano: Kutoa sadaka au kuomba ili aonekane na watu. Vitu hivyo ni vizuri ila moyo hauko vizuri.

2. Mtu anaweza kufanya kitu kisicho sawa lakini moyo wake uko sawa

Mfano:  Wakati wa kazi mtu kuanza kuomba na kusoma Neno.   Kuomba na kusoma neno ni kitu kizuri kutoka moyo mzuri, ila yampasa amalize kazi kwanza, au aombe taratibu huku akiendelea na kazi na si kuacha kazi na kuomba . Mtu wa namna hii anatakiwa ashauriwe zaidi ya kulaumiwa tu, ni mtu mzuri ila anakosea kutumia mambo mazuri aliyonayo.

3.Mtu anaweza kufanya kitu kizuri na moyo wake uko vizuri

Mfano: Mtu anaweza kuomba au kutoa sadaka kwaajili ya kujulikana na Mungu si wanadamu. Huu ni moyo mzuri unaoambatana na  matendo mazuri. Huyu anatakiwa atiwe moyo aendelee kutenda vema.

4.Mtu anaweza kufanya kitu kibaya na moyo wake uko vibaya

Mfano: Mtu anaweza kumsema mtu vibaya kwasababu anamchukia moyoni. Huyu anapaswa aonywe kwa kutumia Neno la Mungu liwezalo kubadilisha moyo.

KITU KIZURI TUFANYACHO KIAMBATANE NA MOYO MZURI

Usifanye kitu kizuri kwa mtu wakati nia au moyo wako ni mbaya. Mfano usiende hotelini kumnunulia mtu chakula, wakati moyoni unataka kuona jinsi anavyokula haraka haraka!  Fanya kitu kizuri kwa moyo mzuri.  Mpeleke kula kwasababu unataka ashibe.  Usianze kufanya semina kwasababu hutaki watu waende semina nyingine inayoanza. Semina unayoanza ni kitu kizuri ila nia yako au moyo wako haupo vizuri una mashindano. Chochote tufanyacho kizuri kiambatane na moyo mzuri.

AMAZIA ALIFANYA MAMBO MAZURI.  INAWEZEKANA ALIMWABUDU MUNGU, ALIOMBA, ALIWAPA MASKINI SADAKA.  PAMOJA NA HAYA YOTE YALIYO MEMA HAKUFANYA KWA MOYO MKAMILIFU. KABLA HATUJAFANYA JAMBO, TUJIULIZE KWA NINI TUNAFANYA? Ni kwaajili ya upendo kwa watu na Mungu.  Ni kwaajili ya kumtii Mungu au kupendeza watu? Tuipime mioyo kabla ya matendo. Kwa kufanya hivi tuyatendayo yatapata kibali kwa Mungu. Mungu anataka tuyafanyayo nje yawe sawa ndani ya mioyo yetu.