Neno la Milele na Neno la Sasa

KUISHI NA NENO LA MUNGU 
(LOGOS na RHEMA)

         I.                                               Lifahamu Neno la Mungu. Katika maandiko, Neno la Mungu linaonekana kwa namna zifuatazo:

A.      Nafsi ya Mungu Mwana

Maandiko yanaonyesha Mwana (Yesu) anaitwa Neno la Mungu. Ni Neno aliyefanyika mwili akakaa na watu (Yohana 1:1-5,14; Ufunuo 19:11-13).

B.       Sauti ya moja kwa moja ya Mungu kwa mtu

Mungu huongea na watu moja kwa moja kwa sauti ya wazi, sauti hii inaitwa “Neno la Mungu” aliongea hivyo na Yohana mbatizaji (Luka 3:2).

C.       Matamshi ayatamkayo mtu kwa uwezo wa Roho Mtakatifu

Roho Mtakatifu ana uwezo wa kusema kupitia kinywa cha mwamini asemacho ni “Neno la Mungu” (1Timotheo 4:1,Luka 21:15,Matendo 6:10).

D.      Matamshi wayasemayo malaika toka kwa Mungu

Mungu hutumia malaika kuleta ujumbe kwa mtu, ujumbe huu huitwa “Neno la Mungu” (Luka 1:26-35)

E.       Maandiko-Biblia

Mungu hutumia maandiko matakatifu, kusema na mtu Neno lake. Humtumia Roho wake Mtakatifu kusema nasi kupitia maandiko. Maandiko(logos)+Roho Mtakatifu=Neno la Mugu(rhema)

Sauti ya Mungu katika maeneo yote manne yaliyotangulia, hupimwa au huthibitishwa na maandiko matakatifu katika Roho Mtakatifu.Katika tafsiri ya Kiyunani Neno la Mungu limetafsiriwa katika maneno makuu mawili 1.LOGOS na 2.REHEMA

LOGOS

Logos ni wazo la Mungu la milele lisilofungwa na muda, wazo hili amelionyesha katika maandiko. Maandiko ni wazo la Mungu (logos),  Soma Zaburi 119:89. Wazo hili limesimama mbinguni milele. Hakuna kinachotokea duniani kiwezacho kulibadilisha mbinguni. Lilikuwepo, lipo na litakuwepo. Wazo hili limeandikwa kwa uwezo wa Roho Mtakatifu kupitia mwanadamu (1Petro 1:20-21). Ingawa maandiko au wazo la Mungu lipo wakati wote ni la milele; Ili kulitumia sasa Roho Mtakatifu hutoka katika umilele na hulileta kwa watu binafsi wakati wa sas, kwa hitaji la sasa.

RHEMA

1. Rhema ni wazo la Mungu la milele laniloonyeshwa au linalotumiwa sasa na Roho Mtakatifu.  Rhema ni Neno la Mungu la milele lisemalo sasa.  Limekuja katika muda wa mtu sasa kwa hitaji la sasa. Tofauti na logos, logos lipo siku zote katika umilele. Rhema huja sasa kwa hitaji la sasa. Roho wa Mungu hulionyesha, hulifunua Neno la milele (logos) katika maisha yetu ya sasa.  Logos ni ukweli wa milele wa Neno la Mungu katika maandiko.  Rhema ni tafsiri ya sasa ailetayo Roho katika hali yako ya binafsi kwa kutumia andiko.

2.Logos ni neno la Mungu kwa ujumla. Rhema ni neno la Mungu maalum, litokalo katika Neno la jumla.

3.Logos ni neno la rohoni.  Rhema ni neno la nguvu ya kudhihirika mwilini.

4.Logos ni neno la nadhria, Rhema ni udhihirisho wa nadharia.

5.Logos ni maandiko yote, rhema ni maandiko unayoyahitaji sasa, upewayo na Roho Mtakatifu.

6.Logos hukaa akilini Rhema hukaa moyoni, ni andiko lililohuishwa na kuwekwa moyoni toka akilini na Roho Mtakatifu.

7.Logos hujenga matumaini akilini , Rhema hujenga imani moyoni

UMUHIMU WA RHEMA

1.       Ukitafakari na kusoma logos akilini, Roho atakupa rhema moyoni

2.       Yote yanawezekana kwa rhema (andiko linaposema hakuna neno lisilowezekana kwa Mungu, Luka 1:37, neno linalotajwa hapo kuwezekana ni rhema).

3.       Maandiko yanaposema imani huja kwa kusikia (kuelewa-akouo) neno la Kristo neno hilo ni rhema (Warumi 10:17).

4.       Usomapo Biblia na kuanza kuelewa maandiko pasipo kufundishwa na mtu, kwa nanma hiyo utaanza kupokea rhema.  Hili ni neno lililofunuliwa kwako, ni upako. Ukipata rhema umepata upako wa kutimiza unachotakiwa kutimiza.

5.       Rhema ni upanga wa Roho.  Katika vita na mashindano Roho atakupa upanga atalifunua neno na kuwa rhema kwako (Waefeso 6:12).  Changamoto zinahitaji rhema.

6.       Yesu alisema imeandikwa (logos), mtu hataishi kwa mkate tu, bali kwa kila neno (rhema), litokalo katika kinywa cha Mungu (Mathayo 4.4). Rhema ni maandiko yanayogeuka kuwa chakula kwako, sio maandiko tu. Ni maandiko yanayokufanya uishi.

PIMA RHEMA KWA LOGOS

Waberoya walipata neno (rhema) walilofundisha mitume, wakalipima kwa maandiko (logos), Matendo 17:11. Ufunuo wowote uupatao katika maandiko au maono sasa, lazima uupime kwa maandiko yote kwa ujumla au shauri na wazo la Mungu la milele (logos).

ISHI NA NENO

Wakati wote ishi na maandiko (logos) kwa kuyasoma ili upate neno (rhema), hili ni andiko lililovuviwa na Roho kuwa chakula, upanga wa vita, mbegu ya imani, nuru ya kukuongoza. Wakati wote 1. Soma Biblia 2. Omba (hasa kwa lugha) 3.Tafakari (lirudie rudie akilini) 4. Uwe na moyo mwepesi 5. Sifu kwa kuimba 5. Andika mawazo mapya uyapatayo katika maandiko (logos) au unapoomba, inawezekana mawazo hayo ni rhema. Kisha yatumie katika maisha yako utaishi na Neno la Mungu. Utaishi na sauti ya Mungu. Sauti ya Mungu ya uhakika huja kwa Neno lake (Logos na Rhema).  Uanzapo kumsikiliza kwa jinsi hii utakuwa salama.